काठमाडौँ । नेपाली वाङ्मयको संरक्षण र संवर्द्धनमा क्रियाशील संस्था दायित्व वाङ्मय प्रतिष्ठान, नेपालले वर्ष २०८२ र २०८३ का लागि विभिन्न प्रतिष्ठित पुरस्कार तथा सम्मानहरूको घोषणा गरेको छ।
प्रतिष्ठानका अध्यक्ष रामप्रसाद पन्तको अध्यक्षतामा बसेको कार्यसमिति बैठकले साहित्य, संस्कृति र सेवाको क्षेत्रमा विशिष्ट योगदान पुर्याउने स्रष्टा तथा संस्थाहरूलाई सम्मानित गर्ने निर्णय गरेको हो।
घोषित सम्मान तथा पुरस्कारहरूको विस्तृत विवरण यसप्रकार छ: दायित्व वाङ्मय विशिष्ट सम्मान-२०८३ वरिष्ठ साहित्यकारद्वय पवन आलोक र डा. रामप्रसाद दाहाललाई प्रदान गरिने भएको छ। दायित्व वाङ्मय सम्मान-२०८३ प्रा. माधव घिमिरे र नारायण ज्ञवालीलाई समर्पण गरिनेछ।
यसैगरी विद्वच्छिरोमणि हेमराज पुरस्कार-२०८३: प्रा. नीलमणि ढुङ्गानालाई प्रदान गरिनेछ, जसको पुरस्कार राशि २५,०००/- रुपैयाँ रहेको छ। दायित्व मुरलीदेवी-गुरुदत्त स्मृति पुरस्कार समाजसेवाको क्षेत्रमा उल्लेखनीय कार्य गर्दै आएको निःसहाय सेवा सदनलाई (राशि रु. २०,०००/-) प्रदान गरिने भएको छ।
प्रतिभा तथा स्रष्टा पुरस्कारहरू (राशि जनही रु. १५,०००/-) प्रदान गरिने जानकारी अनुसार दायित्व यशोदा पन्त प्रतिभा पुरस्कार-२०८२: सरस्वती चौलागाई, दायित्व यशोदा पन्त प्रतिभा पुरस्कार-२०८३: गार्गी चौलागाई, हरिकला-गुणाकर दायित्व रचना पुरस्कार-२०८२: साहित्यकार माधव काफ्ले र दायित्व सीता पन्त स्रष्टा पुरस्कार-२०८३: साहित्यकार निर्मलरमण पराजुलीलाई दिइने बताइएकाे छ ।
विक्रम संवत २०५७ सालमा विधिवत् स्थापना भएको दायित्व वाङ्मय प्रतिष्ठानले लामो समयदेखि नेपाली भाषा र साहित्यको श्रीवृद्धिका लागि काम गर्दै आएको छ। प्रतिष्ठानका अनुसार यी सम्पूर्ण पुरस्कार तथा सम्मानहरू आगामी वार्षिक उत्सवको अवसरमा आयोजना हुने एक विशेष समारोहका बीच अर्पण गरिनेछ।