२०८२ वैशाख ६ – ने.सं. ११४६ बछलाथ्वक द्वितीया रविबार – १९ अप्रिल २०२६
काठमाडाैं, मधेस प्रदेश खबर (नयाँ परिवेश) – महोत्तरीको जलेश्वरमा शनिबार साँझ आएको तीव्र हावाहुरीका कारण रुख टेम्पुमाथि ढल्दा दुईजनाको मृत्यु भएको छ भने चारजना घाइते भएका छन् ।
जलेश्वर–जनकपुर सडकखण्डमा ज१घ ४८५० नम्बरको टेम्पुमा सवार धनुषाकी शकुन्तला पण्डित र महोत्तरीका राहुल मल्लीको घटनास्थलमै मृत्यु भएको प्रहरीले जनाएको छ। दुर्घटनामा चारजना घाइते भएका छन्, जसमध्ये टेम्पु चालक हरेन्द्र ठाकुर र मृतक राहुल मल्लीकी आमा फेकनी देवीको अवस्था गम्भीर छ। अन्य दुईजना सामान्य घाइते छन्।
हावाहुरीका कारण जलेश्वर नगरपालिका–९ र ११ क्षेत्रमा विद्युत् पोलमा रुख ढल्दा ३३ केभी र ११ केभी लाइनमा क्षति पुगेको छ। यसले सदरमुकाम जलेश्वरसहित आसपासका पिपरा, एकडारा, चकवा, मटिहानी, रिंग, सिटी र कट्टी फिडरअन्तर्गतका स्थानमा विद्युत् सेवा अवरुद्ध भएको छ।
नेपाल विद्युत् प्राधिकरणका अनुसार ठुलो क्षति भएकाले आपूर्ति पुनः सञ्चालन गर्न कम्तीमा एकदेखि दुई दिन लाग्ने अनुमान गरिएको छ।